‘‘‘ยถาปิ ภทฺทเก เขตฺเต, พีชํ อปฺปมฺปิ โรปิตํ;
สมฺมาธาเร ปวจฺฉนฺเต, ผลํ โตเสติ กสฺสกํ [กสฺสเก (สฺยา.)]ฯ
[158]
‘‘‘ตเถวิทํ พุทฺธเขตฺตํ, สมฺมาสมฺพุทฺธเทสิตํ;
สมฺมาธาเร ปวจฺฉนฺเต, ผลํ มํ โตสยิสฺสติ’ฯ
[159]
‘‘ปธานปหิตตฺโตมฺหิ, อุปสนฺโต นิรูปธิ;
สพฺพาสเว ปริญฺญาย, วิหรามิ อนาสโวฯ
[160]
‘‘อฏฺฐารเส กปฺปสเต, ยํ กมฺมมกริํ ตทา;
ทุคฺคติํ นาภิชานามิ, ตรณาย อิทํ ผลํฯ
[161]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[162]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[163]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ตรณิโย เถโร อิมา คาถาโย
อภาสิตฺถาติฯ
ตรณิยตฺเถรสฺสาปทานํ อฏฺฐมํฯ
9. ธมฺมรุจิยตฺเถรอปทานํ
[164]
‘‘ยทา ทีปงฺกโร พุทฺโธ, สุเมธํ พฺยากรี ชิโน;
‘อปริเมยฺเย อิโต กปฺเป, อยํ พุทฺโธ ภวิสฺสติฯ
[165]
‘‘‘อิมสฺส ชนิกา มาตา, มายา นาม ภวิสฺสติ;
ปิตา สุทฺโธทโน นาม, อยํ เหสฺสติ โคตโมฯ
[166]
‘‘‘ปธานํ ปทหิตฺวาน, กตฺวา ทุกฺกรการิกํ;
อสฺสตฺถมูเล สมฺพุทฺโธ, พุชฺฌิสฺสติ มหายโสฯ
[167]
‘‘‘อุปติสฺโส โกลิโต จ, อคฺคา เหสฺสนฺติ สาวกา;
อานนฺโท นาม นาเมน [อานนฺโท นามุปฏฺฐาโก (สฺยา.)], อุปฏฺฐิสฺสติมํ ชินํฯ
[168]
‘‘‘เขมา อุปฺปลวณฺณา จ, อคฺคา เหสฺสนฺติ สาวิกา;
จิตฺโต อาฬวโก เจว, อคฺคา เหสฺสนฺตุปาสกาฯ
[169]
‘‘‘ขุชฺชุตฺตรา นนฺทมาตา, อคฺคา เหสฺสนฺตุปาสิกา;
โพธิ อิมสฺส วีรสฺส, อสฺสตฺโถติ ปวุจฺจติ’ฯ
[170]
‘‘อิทํ สุตฺวาน วจนํ, อสมสฺส มเหสิโน;
อาโมทิตา นรมรู, นมสฺสนฺติ กตญฺชลีฯ
[171]
‘‘ตทาหํ มาณโว อาสิํ, เมโฆ นาม สุสิกฺขิโต;
สุตฺวา พฺยากรณํ เสฏฺฐํ, สุเมธสฺส มหามุเนฯ
[172]
‘‘สํวิสฏฺโฐ ภวิตฺวาน, สุเมเธ กรุณาสเย [กรุณาลเย (สฺยา.)];
ปพฺพชนฺตญฺจ ตํ วีรํ, สหาว อนุปพฺพชิํฯ
[173]
‘‘สํวุโต ปาติโมกฺขสฺมิํ, อินฺทฺริเยสุ จ ปญฺจสุ;
สุทฺธาชีโว สโต วีโร, ชินสาสนการโกฯ
[174]
‘‘เอวํ วิหรมาโนหํ, ปาปมิตฺเตน เกนจิ;
นิโยชิโต อนาจาเร, สุมคฺคา ปริธํสิโตฯ
[175]
‘‘วิตกฺกวสิโก หุตฺวา, สาสนโต อปกฺกมิํ;
ปจฺฉา เตน กุมิตฺเตน, ปยุตฺโต มาตุฆาตนํฯ
[176]
‘‘อกริํ อานนฺตริยํ [อกริํ นนฺตริยญฺจ (สฺยา. ก.)], ฆาตยิํ ทุฏฺฐมานโส;
ตโต จุโต มหาวีจิํ, อุปปนฺโน สุทารุณํฯ
[177]
‘‘วินิปาตคโต สนฺโต, สํสริํ ทุกฺขิโต จิรํ;
น ปุโน อทฺทสํ วีรํ, สุเมธํ นรปุงฺควํฯ
[178]
‘‘อสฺมิํ กปฺเป สมุทฺทมฺหิ, มจฺโฉ อาสิํ ติมิงฺคโล;
ทิสฺวาหํ สาคเร นาวํ, โคจรตฺถมุปาคมิํฯ
[179]
‘‘ทิสฺวา มํ วาณิชา ภีตา, พุทฺธเสฏฺฐมนุสฺสรุํ;
โคตโมติ มหาโฆสํ, สุตฺวา เตหิ อุทีริตํฯ
[180]
‘‘ปุพฺพสญฺญํ สริตฺวาน, ตโต กาลงฺกโต อหํ;
สาวตฺถิยํ กุเล อิทฺเธ, ชาโต พฺราหฺมณชาติยํฯ
[181]
‘‘อาสิํ ธมฺมรุจิ นาม, สพฺพปาปชิคุจฺฉโก;
ทิสฺวาหํ โลกปชฺโชตํ, ชาติยา สตฺตวสฺสิโกฯ
[182]
‘‘มหาเชตวนํ คนฺตฺวา, ปพฺพชิํ อนคาริยํ;
อุเปมิ พุทฺธํ ติกฺขตฺตุํ, รตฺติยา ทิวสสฺส จฯ
[183]
‘‘ตทา ทิสฺวา มุนิ อาห, จิรํ ธมฺมรุจีติ มํ;
ตโตหํ อวจํ พุทฺธํ, ปุพฺพกมฺมปภาวิตํฯ
[184]
‘‘สุจิรํ สตปุญฺญลกฺขณํ, ปติปุพฺเพน วิสุทฺธปจฺจยํ;
อหมชฺชสุเปกฺขนํ วต, ตว ปสฺสามิ นิรุปมํ วิคฺคหํ [นิรูปมคฺคหํ (สี.)]ฯ
[185]
‘‘สุจิรํ วิหตตฺตโม มยา, สุจิรกฺเขน นที วิโสสิตา;
สุจิรํ อมลํ วิโสธิตํ, นยนํ ญาณมยํ มหามุเนฯ
[186]
‘‘จิรกาลสมงฺคิโต [จิรกาลํ สมาคโต (ปี.)] ตยา, อวินฏฺโฐ ปุนรนฺตรํ จิรํ;
ปุนรชฺชสมาคโต ตยา, น หิ นสฺสนฺติ กตานิ โคตมฯ
[187]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[188]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[189]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ธมฺมรุจิโย เถโร อิมา คาถาโย
อภาสิตฺถาติฯ
ธมฺมรุจิยตฺเถรสฺสาปทานํ นวมํฯ
10. สาลมณฺฑปิยตฺเถรอปทานํ
[190]
‘‘อชฺโฌคาเหตฺวา สาลวนํ, สุกโต อสฺสโม มม;
สาลปุปฺเผหิ สญฺฉนฺโน, วสามิ วิปิเน ตทาฯ
[191]
‘‘ปิยทสฺสี จ ภควา, สยมฺภู อคฺคปุคฺคโล;
วิเวกกาโม สมฺพุทฺโธ, สาลวนมุปาคมิฯ
[192]
‘‘อสฺสมา อภินิกฺขมฺม, ปวนํ อคมาสหํ;
มูลผลํ คเวสนฺโต, อาหิณฺฑามิ วเน ตทาฯ
[193]
‘‘ตตฺถทฺทสาสิํ สมฺพุทฺธํ, ปิยทสฺสิํ มหายสํ;
สุนิสินฺนํ สมาปนฺนํ, วิโรจนฺตํ มหาวเนฯ
[194]